elhuyar itzaultzaile automatikoaren logoa Itzulpen
automatikoa:
ES FR EN CA GL

San Pedro jaiak antolatzeko bigarren bilera irekia deitu du Udalak

Ekainaren amaieran ospatuko diren San Pedro jaiak lantzen hasia da Udala. Maiatzaren 18ko lehen bileraren ostean, bigarren saioa egingo dute hilaren 25ean, asteazkenarekin. Bilera 19:30ean izango da, kultur etxean.

«Errioa, gure nortasuna» hitzaldi-sortaren bosgarren eta azken saioa egingo dute asteazkenean

Herriko itsas ondarearen inguruan antolatutako hitzaldi-sorta otsailean abiatu zuen Udalak, eta bihar, maiatzak 25, izango da bosgarren eta azken aurkezpena. Arturo Elosegi Irurtia EHUko Ekologia katedradun eta Herrio natur-taldeko kideak emango du. Orioko natur ondarea: ezkutuko altxorrak, agerian izenburupean, gure errioaren inguruko habitat eta espeziei buruz arituko da Elosegi.

Eskola-umeen literatur lehiaketaren sariak banatu zituen Udalak larunbatean

Larunbat goizean, maiatzak 21, aurtengo eskola-umeen literatur lehiaketaren sariak banatu ziren kultur etxean. Lehiaketaren 35. edizioa izan da aurtengoa. Argazkia: KARKARA aldizkaria.

Udako kirol-eskaintza aurkeztu du Orioko Udalak

Anuska Esnal Orioko alkateak, Jose Angel Iparragirre kirol-zinegotziak eta Luis Mari Garitano BPXport enpresaren ordezkariak agerraldia egin dute gaur, maiatzak 23, Arraunetxen. Orioko Udalaren aterkipean, kiroldegiko kudeatzaileek eta herriko lau kirol-eragilek udako denboraldirako prestatu duten eskaintzaren inguruko azalpenak eman dituzte bertan.

Danbolin Musika Eskolak ate irekietako saioak egingo ditu ekainean

Ekainaren 3an eta 10ean, ostiralak biak, ateak irekiko dizkie herritarrei Danbolin Musika Eskolak. Eraikina bera eta eskolaren eskaintza ezagutzeko aukera izango dute herritarrek, eta, horrez gain, gurasoek aukera izango dute, 2022-2023 ikasturteko matrikulazioari begira, ikasketa-planaren berri izateko eta zalantzak argitzeko.

‘Nolako herria da Orio LGTBIQ+ pertsonentzat?’ hitzaldia, ostegunean kultur etxean

Orioko Ahalduntze Eskolaren udaberriko programaren barruan, Ehiera kooperatibako kide Kattalin Miner eta Iñigo Etxezarretak hitzaldia emango dute maiatzaren 26an, ostegunarekin. 18:00etan izango da kultur etxean, eta Nolako herria da Orio LGTBIQ+ pertsonentzat? galderari erantzungo diote bertan. Sarrera doakoa izango da.

Kukuarri Astea antolatu du Talai Mendi elkarteak maiatzaren 22tik 29ra

Urtero bezala, jarduera-sorta antolatu du Talai Mendi mendi-elkarteak maiatzaren bukaeran, Udalaren laguntzarekin. Aurtengoa 9. edizioa izango da, eta igandean hasiko dute programa, mendi-lasterketarekin. Mendi-irteera, gaztetxoentzako ikastaro eta probak, hitzaldiak eta hainbat kirol probatzeko hitzorduak nagusituko dira egitarau oparoan.

Ithaka taldeak bi kontzertu emango ditu bihar

Ithaka musika talde oriotarrak bi emanaldi egingo ditu bihar, maiatzak 20, Orioko Herri Ikastolaren 50. urteurrenaren harira. Lehen emanaldia ikastolako ikasleentzat izango da, 11:00etan, eta 20:00etan herritar guztiei zabaldutako bigarren kontzertua eskainiko dute Herriko Plazan.

Eskola-umeen literatur lehiaketaren sariak banatuko dira larunbatean

Udalak urtero antolatzen duen eskola-umeen literatur eta marrazki-lehiaketak 35. edizioa du aurtengoa, eta sariak banatzeko ekitaldia larunbatean egingo du Euskara batzordeak, maiatzak 21. Kultur etxean izango da ekitaldia, 13:00etan hasita, eta saria irabazi duten haur guztiek hartuko dute parte.

Errepide-mozketak egingo dituzte larunbatean herrian

Maiatzaren 21ean, larunbatarekin, Zaragueta Herri Eskolak antolatutako XI. Kros Txikia egingo dute goizean, eta 10:30etik 12:30era zirkulazioan aldaketak eta trafiko-mozketa puntualak izango dira Hondartza bidean. Gainera, Abaromendi kaleko eta Hondartza bideko hainbat aparkaleku libre utzi beharko dira ostiraletik.

‘Mendian hil, hirian hil’ dokumentala proiektatuko dute ostiralean

Iñaki Peña sendagileak zuzendutako heriotzaren inguruko trilogiaren hirugarren atala da Mendian hil, hirian hil dokumentala. 2020ko Bilbao Mendi Film Festival jaialdiko Sail Ofizialean aurkeztu zuen lana, eta maiatzaren 20an, ostiralarekin, Orion izango da ikusgai 19:00etan kultur etxean. Gonbitak eskuragai daude online zein kultur etxean.

San Nikolas kalea berrurbanizatzeko lanak ostiralean hasiko dituzte

San Nikolas kaleko lurpeko azpiegiturak berritzeko eta ur zikinak eta euri urak banatzeko lanak hasiko dituzte maiatzaren 20an, ostiralarekin. Gainera, etxeetako atarien eta saltokien irisgarritasuna hobetuko dute.