«Manez eta kobreak» taldeak kontzertua emango du Arraunetxen urriaren 2an

«Manez eta kobreak» musika-taldearen kontzertua izango da Orion urriaren 2an, ostiralarekin. Kontzertua 19:00etan izango da, Arraunetxeko aretoan.

Kontzertua udako programaren barruan antolatu zuen Udalak, aurrena, baina atzeratu egin behar izan zen, eguraldi txarragatik. Orduko hartan plazan egitekoa zen, baina orain Arraunetxen antolatzea erabaki du Udalak.

Sarrera doan izango da, baina interesatuek gonbita hartu beharko dute aldez aurretik. Aforo mugatua dela eta, 80 gonbita daude banatzeko eta dagoeneko jaso daitezke kultur etxean. Eskatzaile bakoitzari bi gonbita emango zaizkio, gehienez.

Udalbatzarrak ohiko bilkura egingo du ostegunean, irailak 24

Bilkura udalbatzarraren aretoan egingo da, udaletxean, 19:30ean hasita, eta gai hauek aztertuko dira:

1.- Irakurri eta onartzea, egoki bada, udalbatzarraren 2020ko uztailaren 30eko ohiko bilkurako aktaren zirriborroa.

Asteartean bukatu zen aurtengo hondartza-denboraldia

Joan den irailaren 15ean bukatu zen 2020ko hondartza-denboraldia, eta, beraz, etenda dago dagoeneko hango sorosle-zerbitzua. Hondartzako sarrerak kontrolatzeko semaforo-sistema ere bertan behera geratu da eta dagoeneko kenduta daude sartu-irteerak bideratzeko jarrita zeuden hesiak eta kartelak.

Hondartza-denboraldia bukatu den arren, eguraldi ona dugu egunotan eta, hori dela eta, Udalak egoki ikusi du ohar hau argitaratzea, herritarrei gogorarazteko soroslerik ez dagoela hondartzan eta, beraz, kontu handiz ibili behar dutela bainatzea erabakitzen badute. Bestalde, uda osoan bezala, Udalak jende-pilaketarik ez sortzea eskatzen die hondartzaren erabiltzaileei, COVID-19a dela eta, kutsatzeko arriskua gutxitzeko.

 

Futbol-zelaiko belar artifizialaren banaketa

Udalak egindako eskaintzari erantzunez, jende ugarik egin du eskaera futbol-zelaiko belar artifizialaren zati bat eskuratzeko. Eskaera aurreikusitakoa baino askoz handiagoa da eta, hori dela eta, Udalak ezin izango du egin banaketa hasieran esanda bezala. Banaketa ostegun eta ostiral goizetan egitea aurreikusita zeukan Udalak, baina uste baino denbora gehiago beharko du, guztia antolatzeko.

Osteguneko eta ostiraleko banaketa, beraz, bertan behera geratzen da eta eskaria egin dutenei jakinarazten zaie banan-banan whatsapp bidez edo telefonoz abisatuko zaiela noiz joan behar duten eskatu duten materialaren bila.

Iberdrolak argiteria publikoa moztuko du zenbait kaletan osteguneko gauean

Irailaren 17tik 18rako gauean, ostegunetik ostiralera, argi publikoa moztuko du Iberdrolak herriko kale batzuetan.

Mozketa 00:00etatik 06:00etara egingo da kale eta inguru hauetan:

  • Ibai-Ondo pasealekua
  • Aita Lertxundi kalea
  • Arozenako aparkalekua
  • Antxiola kalea
  • Anibarko Portura doan pasealekua

Herritarrek jakiteko argitaratzen dugu.

Udaletxeko balkoian dago ikusgai Kontxako bandera

Orioko nesken traineruak joan den igandean irabazitako Kontxako bandera egun osoz izango da gaur udaletxeko balkoian, herritarrek ikusi ahal izateko.

Tradizioak agintzen du, arraunlariei egindako errezibimenduaren ondoren, bandera udaletxean jartzea, herriko arraunzaleek bertatik bertara ikusteko aukera izan dezaten. Aurten igandean ez zen arraunlarien errezibimendurik egin, COVID-19ak sortutako osasun-larrialdiagatik, baina Udalak eta Arraun Elkarteak atzo egin zieten omenaldia neska arraunlariei, Arraunetxen antolatutako ekitaldi batean. Ekitaldi horren ondoren, tradizioari segituz, gaur bandera udaletxeko balkoian zintzilikatzea erabaki zuten.

Bandera egun osoan izango da balkoian eta bihar erretiratuko dute.

Futbol-zelaitik kendutako belar artifiziala doan emango die Udalak eskatzen duten herritarrei

Eskaera egiteko epea zabalik da dagoeneko eta asteazken honetan, irailak 16, itxiko da, eguerdian.

Orioko elkarteek eta edozein oriotarrek izango du aukera eskaera egiteko, albiste honen beheko botoian klik eginez zabalduko den formularioa beteta. Bertan adierazi behar da nork egiten duen eskaera, kontaktatzeko telefono eta e-mail bat, eta bakoitzak zenbat metro belar behar dituen.

Zorionak, neskak! Aupa Orio!

Berriz ere handia egin du Orioko nesken traineruak Donostian! Bigarren urtez segidan Kontxako bandera irabazita, bukaera ezin hobea eman diote neskek aurtengo denboraldi arrakastatsuari. Biba zuek!

Denok dakigun bezala, pandemia-egoerak ez digu uzten nesken azaña hau nahi genukeen eran ospatzen, kalean eta herritar guztiek batera, eta, beraz, berriro ere, arduraz jokatzeko eta kaleko festarik ez egiteko deia egin behar die Udalak oriotarrei.

Tabernariei dei egin die Udalak, osasun- eta prebentzio-neurri guztiak betetzeko

Udalak bilera egin zuen atzo, ostirala, herriko tabernarien ordezkariekin eta han hitz egindakoa konpartitu nahi du herritarrekin eta tabernari guztiekin.

Udala eta tabernariak kezkatuta daude datorren igandean, Kontxako estropada dela eta, herrian sortu daitezkeen arrisku-egoerengatik. Aurreko igandean ere izan ziren jokaera desegokiak zenbait tabernatan eta ez dute nahi oraingo honetan errepikatzea.

Udalak eta Arraun Elkarteak ohar bateratua kaleratu dute, arraunzaleei zuhurtzia eta ardura eskatzeko

Honela dio Udalak eta Arraun Elkarteak bat eginda kaleratu duten oharrak:

Datorren igandean, irailak 13, Kontxako estropadako bigarren jardunaldia izango da; egun seinalea Orioko arraunzaleontzat, egutegian markatuta izaten dutena. Aurten, ordea, COVID-19ak sortutako egoera dela eta, ezin izango dugu egun berezi hori nahi genukeen bezala ospatu, eta Udalak eta Arraun Elkarteak dei egiten diegu herritarrei zentzuz eta arduraz jokatzeko egun horretan, arrisku-egoerarik ez sortzeko eta elkar babesteko.

Euskaltegian izena emateko epea zabalik dago irailaren 24a arte

Irailaren hasieran ireki zen epea Orioko AEK euskaltegian izena emateko, eta irailaren 24an itxiko da.

Hiru bide daude euskaltegian izena emateko:

  • Euskaltegira bertara jotzea, Bikamiotako errotondaren ondoan (KTA eraikina). Astelehen eta asteazkenetan hau da ordutegia: 17:00-20:00. Astearte eta ostegunetan, berriz, hau: 8:30-13:30.
  • Posta elektronikoz, Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbidera idatzita.
  • Telefonoz deituta, 670 420 025 zenbakira (Amaia Zaldua).

Udal-liburutegia goiz eta arratsaldez zabalduko da berriro, gaurtik aurrera

Ikasturtea hastearekin batera, udal-liburutegia goiz eta arratsaldez zabalduko da irailaren 7tik aurrera.

Hau izango da ordutegia, astelehenetik ostiralera:

10:00 - 13:00

16:00 - 19:30

Kultur etxearen ordutegia

Kultur etxea ere ohiko ordutegira bueltatuko da gaurtik aurrera:

09:00 - 13:00

16:00 - 20:00