Albisteak
SPRIren eskutik, Urola Kostako Udal Elkarteak OSTIRAL TEKNOLOGIKOAK izeneko egitasmoa antolatu du. Helburua da eskualdeko enpresei digitalizazioaren alorrean urratsak egiteko eta estrategia digitalak garatzeko trebakuntza eskaintzea.
Enpresa txiki, autonomo eta ekintzaileentzat dira tailerrak.
Oribarzarko hondartza itxita egongo da udako denboraldi osoan, herritarren segurtasuna bermatzeko.
Oribarzarko hondartza ez dago bainurako baimendutako Gipuzkoako hondartzen artean, hango uraren kalitatea txarra izaten delako, batez ere marea behean. Horren ondorioz, sorosle-zerbitzurik ez dago eta, beraz, ezin da bermatu erabiltzaileen segurtasuna.
Horrez gain, ondotik pasatzen den errepidea oso egoera txarrean dago eta arriskua dago zati batzuk hondartza gainera erortzeko. Hori dela-eta, Udalak hesituta dauka Oribarzarko hondartza eta arriskuaz ohartzen duten seinaleak jarri ditu.
Astearte honetan, ekainak 15, irekiko da hondartza-denboraldia Orion, Gipuzkoako kostaldeko beste herrietan bezala. Irailaren 15a arte iraungo du.
COVID-19ak sortutako osasun-krisiak eragina izango du udako denboraldiaren antolaketan eta, iaz bezala, Udalak hainbat neurri hartu ditu hondartzaren erabilera arautzeko. Helburua, betiere, bertako nahiz kanpoko erabiltzaileen segurtasuna bermatzea da, eremuaren masifikazioak sortu dezakeen kutsatzeko arriskua gutxituz.
Herriko Plazan, Endaia plazan eta Aritzaga kalean egindako obrak bukatu ondoren, instalatu diren estolda eta hodi berriak garbitu behar dira, obraren eraginez sortutako zakarrak eta hondarrak erretiratzeko eta instalazioa behar bezala funtzionatzen uzteko.
Udala herriko aparkalekuen lanketa egiten ari da eta hainbat bilera egin ditu herritarrekin gaia aztertzeko eta eremu batzuetako arazoei konponbidea emateko.
Anibarko Portua
Lanketa horren barruan, Udalak erabaki du aurrerantzean Anibarko Portuko aparkalekuak oriotarrentzat izango direla eta, beraz, kanpotik datozen ibilgailuek ezin izango dituzte erabili. Egun hauetan pintatuko ditu Udalak lurreko seinaleak, hori adierazteko.
Anibarko Portuan erabilera librekoak izango diren aparkaleku bakarrak ekialdeko muturrekoak izango dira (irudian, puntu zuri batez markatutako eremua).
Argazkian ikusten den zebra-bidea oso egoera txarrean dago eta Udalak guztiz berritu behar du. Hori dela-eta, bihar asteazkenetik hasi eta astebetez, itxita izango da Abaromendi kaleko bide-zati hori ibilgailuentzat.
Mintzalagun programak harremanetan jartzen ditu euskaraz dakiten pertsonak eta ikasten ari direnak, astean ordubetez euskaraz hitz egiteko. Ikasturtean zehar 70 pertsona inguru ibili dira Mintzalagun programan Urola Kosta bailaran, hiruzpalau laguneko talde txikitan banatuta. Egitasmoak duen harrera onak bultzatuta, udan ere eskaintzea erabaki dute programaren arduradunek.
Aurtengo egoera kontuan hartuta, AEK-k ahalegin berezia egingo du jarduera espazio seguruetan eskaintzeko eta segurtasun-neurri guztiak betetzeko.
Gaur goizean hasi eta asteazkena bitartean, Iberdrolak hainbat lan egin behar ditu sare elektrikoan. Hori dela eta generadore bat instalatuko du AutoLan tailerraren eta Gaztelekuaren inguruan dagoen transformadorearen ondoan, konponketa-lanak egiten dituen bitartean energia-hornidura ez eteteko.
Generadoreak zarata sortuko du eta Iberdrolak barkamena eskatzen die bizilagunei eragozpenengatik eta adierazi du saiatuko dela ahalik eta arinen egiten.
Lanak aurreikusita bezala egiten badira, asteazken goizean kenduko da generadorea.
Aurreko urtetan bezala, udan kirol egiteko aukera ugari izango dute Orioko haur eta gazteek, Udalak, kiroldegiak eta herriko eragileek antolatutako jardueretan. COVID-19ak sortutako osasun-krisiaren eraginez, osasun- eta higiene-baldintzak eta aforoak bereziki zainduko dira jarduera horietan, baina, bestela, normaltasunez egingo dira.
Kirol-jardueretan izena emateko epea zabalik egongo da ekainaren 13ra arte.
Udalak hainbat bilera egin ditu azken hilabeteotan, autokarabanen aparkalekuen gaia aztertzeko. Alde batetik, hainbat aldiz bildu da herriko autokarabana-jabeekin eta, bestetik, bilerak egin ditu autokarabanekin kexak zituzten bizilagunekin. Autokarabanen aparkalekuen gaiak gatazkak sortu izan ditu, autokarabanen kopurua asko handitu delako azken urteotan eta behar bezala arautu gabe zegoelako.
Herritarren elkarbizitza eta irisgarritasun-irizpideak zaintzea lehentasunezkoa da Udalarentzat eta, horretarako, ezinbestekoa ikusi du autokarabanentzako eremuak zehaztu eta mugatzea eta hirigunetik ateratzea. Prozesu guztia autokarabana-jabeekin eta eragindako herritarrekin harremanetan egin du Udalak, adostasunak eta konplizitateak bilatuz, guztiek zutelako gaiari irtenbide egokia emateko interesa.
Urola Kostako Udal Elkarteak Zumaian duen Soldadura Zentroan soldadura, fabrikazio eta muntaketako Oinarrizko Lanbide Heziketa ikas dezakete Derrigorrezko Bigarren Hezkuntza (DBH) gainditu ez duten 15, 16 eta 17 urteko gazteek. Ikasketa praktikoak dira, soldadurako lanbidearen oinarrizko ezagupenak eskuratzeko.
Herri-baratzen erabilera arautzen duen udal-ordenantzari alegazioak aurkezteko epea joan den astean bukatu zen eta ez da alegaziorik aurkeztu. Ondorioz, ordenantzan ezarritakoaren arabera, Udalak berehala jarriko du martxan herri-baratzeak adjudikatzeko prozedura.
Prozedura horren barruan, lehen pausoa epe bat irekitzea da, herri-baratze horietako bat erabili nahi duten interesatuek eskaera Udalean aurkeztu dezaten. Epea ekainaren 1etik 25era bitartean egongo da zabalik (biak barne).