Alkatearen gutuna, San Pedro jaiak direla-eta: Eskerrik asko, Orio!

Traducción automática al castellano

Anuska Esnal alkateak esker oneko gutuna idatzi die aurtengo San Pedro jaiak antolatu dituztenei eta era batera edo bestera parte hartu duten herritarrei. Honela dio:

Eskerrik asko, Orio!

Oinarri horia eta arrantzalea duen herria da gurea. Taldean lan egiten eta taldean eragiten dakiena. Eta hori erakutsi du berriro San Pedro jai hauetan ere.

Poz-pozik nago Txurrumuski elkarteak, altxorren harrobi horrek, jaietako txupinazoa bota zuelako. Ohore bat izan zen bertan egon ahal izatea. Pozik nago, baita ere, Arrantzaleen Eguna antolatu zuen lantaldeak herriaren nortasuna berreskuratzeko eta erakusteko urtez urte egiten duen ahaleginak fruitua ematen duela ikusten dugulako. Pilota elkarteak, dantza-eskolak, ikastolak eta eskolak antolatutako ekitaldietan jende mordoak parte hartzeak pozten nau. Erraldoi eta buruhandiek, puzgarriek, trikitixa-txapelketak eta Danbolin Musika Eskolaren kontzertuek, besteak beste, halako jende pila mugitzen dutela ikusita ere, nola ez egon pozik?

Ekitaldiak antolatzen aritu diren herriko elkarte guztiei eskerrak eman nahi dizkiet, baina, eskerrak emateaz gain, Udalaren eta nire babes osoa eskaintzea da gure nahia. Bide horretan jarraituko dugu.

Hala ere, askotan bideak zailak eta malkartsuak direla ere adierazi dut festa hauetan. Ondo asko dakite hori Orioko emakumezko arraunlariek. Ziur naiz lortu berri duten Euskotreneko lehen garaipen honek zapore ezin hobea utzi diela. Bejondeizuela, neskak!

Baina, batik bat, ohorea eta harrotasuna da pertsona eta izaera guztiak errespetatu dituen festa batzuk igarotzea. Eskerrik asko, Orio!

Anuska Esnal Oliden, Orioko alkatea

sanpedroBI19

Webgune honek cookie propioak eta besteenak erabiltzen ditu, nabigazio zerbitzuak hobetzeko asmoz. Nabigatzen jarraitzen baduzu, gure cookieen politika onartzen duzula ulertuko dugu.