elhuyar itzaultzaile automatikoaren logoa Itzulpen
automatikoa:
ES FR EN CA GL

Moilako galiboa lau metroko altueran jarri du udal-brigadak

San Pedro jaiak amaituta, txurro-saltzailearen kamioiak moilako galiboa bota zuen herritik irtetera zihoanean, larunbatetik igandera bitarteko gauean. Ondorioz, igandean eta astelehenean, ezin izan da moilako bidea erabili herritik irteteko.

Aste honetan egingo dituzte Arrantzale kaleko zanga estaltzeko lanak

Euskaltelen eta Nortegasen hodiak kanalizatzeko zanga bat zabaldu zuten duela urte batzuk Arrantzale kaleko 2-4 atarien artean (Arkaitz tabernatik hasi eta Dia saltokiaren pareraino). Azken urteetan zorua hondoratzen joan da pixkanaka, eta oso arriskutsu dago oinezkoentzat. Horregatik, aparkalekuen zorua berritzeko lanak egingo dituzte aste honetan, asteazkenetik ostiralera, eta bide batez, egoera txarrean dagoen arketa konponduko dute.

Astelehenetik aurrera berriro jarriko da martxan Goiko Kalera sartzeko semaforoa

Zirkulazioari lotuta Udalak hartu dituen hainbat erabakiren ondorioz, nabarmen handitu da motordun ibilgailuen joan-etorria Goiko Kalean. Horrek arazo ugari sortzen ditu auzoan eta, arazo horiek konpontzeko, Hirigintza Batzordeak erabaki du berriro jartzea semaforoa Goiko Kalera sartzeko. Astelehenetik aurrera jarriko da martxan.

Itsasoari lotutako kultur eskaintza zabala, udako hiletarako

Bihar, larunbatarekin, abiatuko da udako kultur programa, dozenatik gora ekitaldi biltzen dituena. Jarduera aipagarrien artean daude haurrei zein helduei zuzendutako aire libreko zinema-emanaldiak eta itsasoari lotutako kultur eta kirol jarduerak. Bestalde, iazko arrakastaren ostean, Gure Zirkuak Mendibeltz parkean igaroko du abuztua. Programaren euskarri fisikoa gaur banatuko da etxez etxe, eta ekitaldien inguruko informazio guztia Udalaren webguneko Agenda atalean ere izango da eskuragarri.

Larunbatean hasiko da Orion Nazioarteko Flysch Organo Jaialdia

Gipuzkoako Foru Aldundiak Nazioarteko Flysch Organo Jaiadiaren 12. ekitaldia antolatuko du uztailean Debako, Zumaiako, Getariko eta Orioko Udalekin elkarlanean. Orion abiatuko dira entzunaldiak larunbat honetan, uztailak 2, Aaron Rivas organo-jotzailearen emanaldiarekin. Sarrera doakoa izango da.

Uretako puzgarriak eta jolasak bertan behera geratu dira

San Pedro jaien programaren barruan, uretako puzgarriak eta jolasak zeuden iragarrita gaur arratsalderako, ekainak 30, 18:00etatik aurrera. Eguraldi eskasaren eraginez, ordea, bertan behera geratuko dira. 

Itsas ondareari buruzko bisita gidatuak egingo dituzte udako larunbatetan

Bihar, uztailaren 2an, hasiko dituzte turismo-bulegoak antolatutako udako bisita gidatuak. 11:00etan turismo-bulegoaren paretik irtengo da gida, eta herriko historiaren pasarte esanguratsuenak azalduko ditu ordubeteko saioan. Bisita doakoa izango da, baina aldez aurretik izena eman behar da.

San Nikolas kaleko lanak eten egingo dituzte uztailaren 4ra arte

Gaur hasi eta ostegunera arte, ekainaren 28tik 30era, ospatuko dira San Pedro jaiak, eta ondorioz, San Nikolas kaleko lanak eten egingo dira datorren astelehenera arte, uztailak 4. Saneamendu-lanak bukatu dituzte dagoeneko, eta lurra berdintzea eta baldosak jartzea falta da.

Ikusgai daude kultur etxean bide-heziketako ikastaroko haurrek egindako marrazkiak

Udalak Orioko haurrentzako bide-heziketa ikastaroak antolatu zituen maiatzaren 2tik 31ra, eta guztira, herriko bi ikastetxeetako hirurehun bat haurrek hartu zuten parte. Ikastaroaren amaieran egindako marrazkiak ikusgai izango dira gaurtik ostegunera, ekainaren 27tik 30era, kultur etxean.

Txu-txu trenak ez du zerbitzurik emango gaur

Joan zen astean jarri zen martxan txu-txu trenaren zerbitzua, baina, ibilgailuak hots arraroak egiten dituela ikusita, azterketa teknikoa egingo diote gaur eta, ondorioz, ez du zerbitzurik emango.

Aurtengo Bisiguaren Festa uztailaren 15etik 17ra izango da

Gaur goizean aurkeztu dute uztailaren 15etik 17ra ospatuko den 13. Bisiguaren Festa. Agerraldia Herriko Plazan egin da eta bertan izan dira Anuska Esnal Orioko alkatea, Turismo-batzordeko Bakartxo Oliden burua eta Lourdes Salsamendi, Ana Priede eta Jose Angel Iparragirre batzordekideak, eta herriko zazpi parrilleroak: Katxina jatetxeko Joxe Miel Zendoia, Xixario jatetxeko Luis Mari Uranga, Joxe Mari erretegiko Mikel Manterola, Sarasua erretegiko Joseba Etxezarreta, Orioko Barra jatetxeko Aratz Arregi, El Vaskito jatetxeko Iñaki Azkue, eta Euskal Parrilla jatetxeko Jose Ignacio Atorrasagasti. Parrilleroek, gainera, zuzenean erre dute bisigua ekitaldian.

Larunbatean egingo dute Orioko arraunlari beteranoen traineru-estropada

Arraunlari beteranoen La Salve ligako egutegiaren barruan, Orioko estropadaren zortzigarren edizioa egingo dute ekainaren 25ean, larunbatarekin. Badok13 arraunlari beteranoen elkarteak antolatutako proba da eta bi txandatan jokatuko da, 15:00etan hasita.